दशकानुदशके आपल्या विनोदाने प्रेक्षकांना खळखळून हसवणारे दिग्गज विनोदी अभिनेते राजपाल यादव यांना केवळ २.५ कोटी रुपयांच्या धनादेश बाऊन्स प्रकरणात तुरुंगवास झाला आहे.
बॉलिवूडमधील दिग्गज विनोदी अभिनेते राजपाल यादव यांनी गुरुवारी दिल्लीतील तिहार तुरुंग प्रशासनासमोर शरणागती पत्करली. 2.5 कोटी रुपयांच्या धनादेश (चेक) बाऊन्स प्रकरणात दिल्ली उच्च न्यायालयाने कोणताही दिलासा देण्यास नकार दिल्यानंतर त्यांनी हा निर्णय घेतला.
राजपाल यादव यांनी शरणागतीसाठी दिलेली मुदत वाढवून देण्याची विनंती केली होती. मात्र, न्यायालयाने ती फेटाळली. त्यानंतर त्यांनी तिहार जेलमध्ये हजर होत कायदेशीर प्रक्रिया पूर्ण केली.
“माझ्याकडे पैसे नाहीत” – राजपाल यादव
या संदर्भात बोलताना राजपाल यादव यांनी अत्यंत भावूक शब्दांत आपली व्यथा मांडली. त्यांनी सांगितले,
“सर, काय करू? माझ्याकडे परतफेड करण्यासाठी पैसे नाहीत. दुसरा काही उपायही दिसत नाही.”
“इथे मित्र नसतात”
त्यांच्या जवळच्या आणि आर्थिकदृष्ट्या सक्षम मित्रांकडून मदत का घेतली नाही, असा प्रश्न विचारण्यात आला असता त्यांनी स्पष्ट शब्दांत सांगितले,
“इथे आपण सगळेच एकटे आहोत. इथे मित्र नसतात. ही संकटाची वेळ मला एकट्यालाच सामोरी जावी लागणार आहे.”
राजपाल यादव यांनी अनेक दशकांपासून आपल्या अभिनयाने आणि विनोदाने प्रेक्षकांना खळखळून हसवले आहे. मात्र, सध्या ते आर्थिक आणि कायदेशीर अडचणीत सापडले आहेत.
